Today on Deciphering Inspirational Messages.  I want allyuh tuh read dat quote and read dat quote good. Read it! Read it again!

Ok, Ok, Ok, It sound nice eh! Ah mean it sound so sweet. Make yuh want to run and give that person dat send it tuh yuh a nice big hug! It make yuh feel all tingly tinking about all dem kisses… well it depend on who doing the kissing and why dey kissing yuh, if yuh want dem tuh kiss yuh and well other tings.  Jus Sayin!

Sorry leh me stay on subject. Tulip in meh head can be very distracting!

You read it an yuh think “awww, dat so sweet, look at how much kisses dey want to give me!”

BUT… Read closer…  The person who send yuh this doh like yuh!

Allyuh ever see a damn blizzard?

Allyuh ever clean up after a damn blizzard.

So if somebody have de damn nerve tuh send yuh dat, dey is not yuh friend! The only time yuh forgive dem is if yuh know for a fact they never see a damn blizzard.

Why anybody who like yuh  dat much want tuh send a blizzard fuh you is beyond me.  Forget about the kissing now, they sending you hard labor.

Yuh ever walk in a damn blizzard? The only time that it fun tuh watch is on TV becasue you doh have to clean up after. Yuh doh even want tuh watch it from yuh house, because yuh know dat when all dat done coming down and blowing around is YOU who have to go and clean up dat blasted snow.  Ah blizzard in not 5 flipping inches as snow eh! Yuh lucky of you could even get out ah yuh house.

Yuh know who like blizzards, dogs and children, an ah doh mean de children dat actually old enough tuh help clean up! Why? Because dem doh have to clean it up, all dey have tuh do is play in de snow.

So if somebody have de damn nerve tuh send yuh dat “Inspirational thought”, return tuh dam sender because deh is not yuh friend!

Have a Terrific Thursday!
Madame Joy!